..ما قبل البداية
بصوا بقى
البلوج ده أنا عامله كمخبأ تكنولوجي متطور هرباً من الإنسانة الميمونة والجوهرة المدفونة اللى هيه المدام
(طويلة العمر كثيرة الصحة ينصرها على من يعاديها هاي هيي)
يعنى من الآخر بلوج للفضفضة بدل ما أكلم نفسى.. أو بدل ما أتجنن وأروح أتكلم مع قوى الشر (الزوجات) المتحالفة ضد قوى الخير (الأزواج) يعني
..لعلمكم أنا مكنتش كدا.. دا انا كان بيتضرب بيا المثل في التعقل والإتزان وعدم الطيش فى البلوجات
لكن منها لله اللى كانت السبب.. ماهو لكل شيء سبب.. ولهم الدنيا كزوجات ولنا الآخرة كأزواج
القصة إن واحدة زميلتي في ليلة غبرا (ينتقم منك يا "كيتي") إديتني رابط لبلوج عامله الآنسة "برايد" ومسمياه "عايزة أتجوز".. فقررت إني أخد "موقف جريء من شاب طائش يعقبه الندم" بفتح البلوج ده كحركة معارضة وأمثل فيه "الرأي الآخر" زي ما بيعملوا في الدش.. إحتمال أعرف أنقذ كام مليون مصرى من الكارثة الإجتماعية اللى هما متصربعين عليها بالجواز
المهم ماطولش عليكم وأنا رغاى بالسليقة
(حلوة السليقة دي.. بتفكرنى بلحمة الراس مش عارف ليه)
هابقى أحكيلكم على كل حاجة من طقطق لسلامو عليكم بالتفاصيل من أول ما إتخرجت من الكلية لحد أول إمبارح
..أو لحد ما تزهقوا مني
..سيّدي القارئ
أقسم لك إن كل ما ستقرأه هو الحق.. كل الحق.. ولا شيء إلا الحق
(لكنه مصاغ في قالب فكاهي إشفاقاً عليك من الشلل النصفي وآلام العصب السابع)
أقسم لك إن كل ما ستقرأه هو الحق.. كل الحق.. ولا شيء إلا الحق
(لكنه مصاغ في قالب فكاهي إشفاقاً عليك من الشلل النصفي وآلام العصب السابع)
..سيّدي القارئ
..إخلع نعليك فأنت في مخبأي المقدّس
(وإلا هاتجيلك تينيا القدمين لأنى مش بالاقى حد يسمعني ومصدقت فتحت بلوج)
تبتدي منين يا واد يا متزوج..؟ تبتدي منين يا واد يا متزوج..؟؟
أيوه.. نبتدي من موضوع التجنيد
ماهو التجنيد ده هوه اللعنة اللى مكتوبة على كل شاب لسة مخلص وواخد الحياة بصدره.. فييجي التجنيد كدا وكأنه خد القطر بالحضن بصدره المفتوح
نلتقى بعد الفاصل
(نزّل يا واد يا صبحي شاى بالنعناع معمول على تفل جديد مخصوص للرجالة على حسابي)
(أما الستات فهات لهم حاجة ساقعة على حسابهم إحتمال يطلعوا دسيسة من المدام وتلفق لي تهمة بعزومتهم)
هناك 5 تعليقات:
يا سلام ع الدماغ العالية
هو صحيح انت في صفوف المعارضة بس برضه
الذوق بيجبرني اني أهنيك ع المدونة
تعالى حط تعليق عندي و قول للناس عليه
بيخش عندي ناس حلوة كتير و هيتملى عليك تعليقات انشاء الله
شفت بأه احنا طيبات ازاي
ظالمينا كده على طول
عموما ...بكره المدام تقفشك
:P
وساعتها لا هتعرف تعزم على شاي بالنعناع و لا حتى حاجة ساقعة
ساعتها احنا اللي هنوزع على ذكراك قرص
;)
تحياتي
ايه دا !!! انا سمعت حد بيدعى عليا ؟
ليه يابنى كدا دا احنا حتى اصحاب ؟ عمرك شوفت منى حاجة وحشة قبل كدا ؟ مش لما بتتضايق من حاجة بتيجى تفضفض مع اختشك كيتى برضه ؟
ماشى ماشى . سامحينى يابرايد . انا اللى شوفت البلوج بتاعك وعجبنى مووووت بجد . بس انا مش عارفة ايه اللى خلانى انطسيت فى حواجبى واديت للأعدقاء اللينك بتاع البلوج بتاعك . معلش ياحبيبتشى كل انسان وليه اخطاءه برضه ..
على العموم انا مبسوطة انك مش زعلانة منى على العملة السوخة اللى عملتها دى . وسامحينى ينوبك فيا ثواب ..
وانت ياللى فى بالى . إياك تعك انا بقولك اهوه . هتلاقينى بنط فى كرشك والنعمة .. مش نبقى علمناهم الشحاتة سبقونا على الإبواب . وإحترم البنات الشربات نص المجتمع أمات دم خفيف اللى هييجوا يتفرجوا عليك . قـ ـ صدى على البلوج يعنى بتاعك دا ..
أما نشوف اخرتها إيه معاكوا .. ماهو ياأحنا ياأنتوا والأيام بيننا .
Dear motazaweg,
First of all congratulations on your nice blog
although i disagree with you that marriage is like a bathroom (7aram 3aleek ya she7' da kalam te2olo 3ala elgens elna3em maho elgens elna3em na3em we elgens el7'eshen 7'eshen)
anyway men fawk haza almenbar al7or ana ad3o gami3 elshabab lelgawaz
(hab2a akteblak tany we elmadam mesh ganby ;))
كنت حالف مكتبش تعليق قبل ما ألاقي رجالة فى البلوج.. متشكرين يا عم سقراط على فك الأسر بتاعى
أصل بصراحة كان منظري يكسف وأنا عامل فيها زعيم ثوري للتمرد على الجواز وفي الوقت ذاته كل اللى علقوا كانوا بنات.. حسيت إن الواقع مناقض لمجموعة المبادئ المقام عليها البلوج ومش ماشي أبداً مع هدف التأسيس
متشكر خالص يا برايد على تشجيعك رغم إنك فى صفوف المعارضة.. صدقينى تواجدك فرق معايا جداً لأنك السبب الفعلي فى ضربان فكرة البلوج فى دماغي
ومتشكر على عرضك في إنى أحط لينك البلوج بتاعى فى البلوج بتاعك.. بس بصراحة مقدرتش أعمل كدا.. حاسسها طريقة رخيصة للدعاية وجذب الناس متسلقة على نجاح البلوج بتاعك
عارف إنى مكلكع.. عديها.. بس أساس فكرة المدونة هوه التفريغ والفضفضة بالدواخل بأكثر منها فكرة منبر خطابى محتاج جمهور
منكرش إن وجود جمهور وإحساسك إن فيه حد بيسمعك وطالب يسمعك أكتر بيكون شيئ مشجع على مزيد من الكتابة ومزيد من التفريغ وبيكون زى جايزة البلوجر المعنوية
لكن أوقات كتير العملية فى بعض الأوقات بتتقلب للكتابة من أجل الناس مش الكتابة عشان أنا عايز أكتب.. ده أنا مش عايزه يحصل معايا علشان أنا أرنون قوى ومش باكتب غير وأنا فى المود اللى بيبقى طالب كتابة
إتكلمنا الكلام الجاد اللى بيجيب كآبة وخلصنا؟.. يبقى ممكن نهزر بقى شوية
المدام سيادتك لو قفشتنى سيادتك.. يبقى سيادتك فيه حد فتن عليا وعرفها طريق البلوج سيادتك
وده لو حصل سيادتك.. فهاتكونى أول مشتبه فيه سيادتك وإبقى قابلينى لو إتجوزتي بعدها سيادتك.. لأن فى الأغلب سيادتك هاتحتاجي كونسولتو جراحين تجميل بعد ما أطبق فى زمارة رقبة سياتك
لا لا لا.. باقول لكم ايه يا جماعة.. مش عايزين حركات خيانة من أولها.. ده كدا الواحد يبتدي يحاسب على كلامه معاكم ولا ايه؟
(حلوين سطرين التثبيت اللى فاتوا دول.. أصلها ممكن تاخد العملية بالعناد وتبلغ الحكومة بسبب السطرين اللى قبلهم.. فوجب التثبيت السابق لحقن الدماء)
نيجي بقى لكيتي.. وإللى غالباً هاتكون تاني مشتبه فيه حكم أنا عارفها كويس تعشق النميمة عشق الصرصار لشنباته
أنا مدعتش عليكى يا باشا.. هوه انا أقدر؟
(كيتى بالذات لازم من أولها لآخرها تثبيت وإلا هاتبعت لكوكب عشوائي بمكوك فضاء رحلة ذهاب فقط)
إن شاله اللى يكرهك يا رب.. مين اللى يقدر يدعى عليكى يا عظيمة.. تبقى أمه مش عايزاه اللى يزعلك يا شيخة
ومايكونش عندك قلق منى خالص.. وهاحترم البنات الشربات نص المجتمع أمات دم خفيف (أمات دم يلطش لاء).. وييجوا يتفرجوا عليا براحتهم وعلى كيف كيفهم طالما من طرفك يا غالية.. ولو عايزانى أجيب ضلف البلوج وأبطله خالص.. إنت بس تأمرينى وأنا هانفذ على طول
(إمتى تتجوزى بقى وتنالي عقاب السماء العادل خلينا نرتاح منك نهائي)
حبيب قلبي سقراط.. مخليك للآخر وإنت الأمل تنتقم ليا لو حصل لي حاجة
مين قالك إنك مش موافقني على إن الزواج زي الحمام؟ إنت موافقنى بس مش واخد بالك..
إنت مش لسة قايل بالعنجليزي إنهم الجنس الناعم؟
أنا بس ماكتفيتش بالنعومية.. أنا كملت وقلت ناعمة وقوية وكلها حنية.. يبقى مالهاش علاقة بالحمام إزاي؟ إنت مابتتفرجش على إعلانات؟
أعتقد دلوقتي العلاقة ابتدت تتضح بصورة أكثر عمقاً
أما بخصوص دعوتك لكل الشباب للزواج.. فأنا بصراحة باطعن فى هذا الإعتراف الغريب وباندد إنه إعتراف تحت ضغط وتهديد لأن المدام بتاعتك كانت واقفة جنبك.. صح؟
مش كاتبين فوق إخلع نعليك قبل الدخول؟ حد يا راجل يجيب المدام بتاعته لحد المخبأ؟؟
(كدا ضمت رحلة للكوكب المجهول رسمي.. وغالباً سقراط هايكون معايا كمرافق)
عزيزي motazaweg
كيفك وكيف أحوالك؟
المرة ديه قلت أكتب بالعربي عشان أخد راحتي شوية.
شوف يا سيدي أنا كنت بكلم واحدة أعرفها علي ال(MSN)قالتلي شوف الرجالة الأندال ديه عمايل يعملوها أهو واحد وقف حراسة أهوه
أنا بصراحة مفهمتش أيه موضوع حراسة ده قولتلها حراسة علي أيه؟
قالتلي وقف حراسة علي بوابة الجواز وعايز يمنع الرجالة يدخلوا، البيه فاكر نفسه لسة في الجيش.
بصراحة أنا مصدقتش نفسي في الأول قلت معقول ياد يا سقراط يكون فيه واحد متجوز يفكر يعمل العملة ديه ومش خايف علي روحه من المدام ده سقراط بجلالة قدرة كان بيخاف من مدامته (قصدي سقراط الأصلي مش المصري)
أنا قولتلها الصراحة هو بيحرس سراب لأن الباب ده مش موجود ديه حفرة ياماما
ومش عارف ليه أفتكرت النكتة بتاعة العشرة الصعايدة اللي ماشيين طابور ووقعوا كلهم في حفرة واحدة :)
ماطولش عليك يا حارس أصدي يا متزوج يا أخويا أنا قلت أدخل أشوف مين الراجل المتهور ده (أكيد طبعاً ديه لو المدام شافت المخبأ ده هايكون يومك أزرق مخطط بكحلي)
المهم أنا في الأول ماكنتش واخد خوانه والمدام كانت جنبي وطبعاً كان لازم أوضح موقفي من الحراسة يعني هاقف معاك حراسة ولا هاقف في خندق الأعدقاء
طبعاً أنت فاهم كويس اللي حصل بعد كده :))
بالنسبة لموضوع الحمام ده فأزاي تقول أني موافقك بس مش واخد بالي (الجملة ديه بالذات أنا معروف بيها)
من حيث أنها ناعمة وقوية وكلها حنية فأنا طبعاً أختلف معاك (طيب قوية وفهمناها لكن أيه حنية ديه؟؟)
بالنسبة لدعوتي للشباب أنهم يتجوزوا فهي مش دعوة ديه حقيقة.
شوف يا حارس أصدي يا متزوج اللي قال أن مراية الحب عامية كان عنده حق تماماً
الواحد بيجي في فترة وتلاقي كل الناس بتقولوا خلي بالك، يا أبني أنت رايح علي الحفرة برجليك، وهو ولا هنا البيه فاكر نفسه أنه هو اللي هايجيب الديب من ديله لحد ما يقع علي دماغه زرع بصل ويعرف أن هو اللي كان مش دريان وأن الباقيين كانوا عندهم حق.
هيييييييييييييه يا متزوج فكرتني بالأيام ديه.
الواحد كان فاكر نفسه هايعمل اللي ماحدش عمله قبله.
المهم أنا مستني بقيت أجزاء قصة الكشف الطبي.
شد حيلك وربنا يعينك
سلام يا حارس السراب ;)
صحيح هو رحلة الكوكب المجهول هاتطلع أمتي عشان ألحق أحجز
إرسال تعليق